اسمك اللي بقـى غصه .. بـ حلق الكلام

نشتاق ، نتعب !
ليه يا قلب نشتاق ؟
ننسى . واذا مرّت الذكرى .
نموت أكثر .
ويتكسّر ، حلم كنت أرسمه بـ ايدي
أزيد شوي ، وأشيل شوي
هناك الورده البيضا ،
وفوق الخافق الأحمر .
وألوّنْه بتناهيدي !
وعلى فكره ،
ترا من ضمن حلمي ( بس شوفك عيد ) .
تظن انّي بعد فعلك ،
بشوف فـ دنيتي عيدي ؟

اسمك اللي بقى غصّه بـ حلق الكلام ..
اسف ان عفتني .. واسف لو اشتقتلك !

للحنين الصور .. لـ احزان قلبي سلام ..
اللي ضاقت بها الدنيا .. وتتحمّلك .

كل ما هبّت الذكرى وطار الحمام
آتنهّد ، وأفكّ زراري ، وآحنّلك ,.

انت لو مالك فـ ( قلبي الكبير ) احترام
كان ما طاحت الدمعه .. ( وانا اتخيّلك )

وانا سخّرت لك عمري رضا واهتمام
كنت خايف عليك أكثر من الحاجه لك !!

وانت رتّبت عذر فراقنا قبل عام ..
وقتها ( ماتت أحلامي ) ولا قلتلك ..

رغم هذا الحزن فيني عليّ الحرام ..
أذكرك ، وأدعي : ( ياجعلي مـ أذوق زْعلك )

فات ما فات من ( جرح وعتاب وملام )
ومدري أهملتني ؟ ولا القدر مـ امهلك !

ودّي اروح واتوسّد ( يد امّي ) وانام ..
يالحبيبه ، وانا ميّت قهر بسألك :

وش بقى للمشاعر ؟! وش بقى للكلام ؟!
وانت كرّهتني قربك .. وأنا بـ أوّلك .

كان غيري معه ( شوق ، وحنين ، وغرام )
لو عطى ربع مما اعطيت ، يستاهلك ..

وافترقنا وفي صدري ( حمامة سلام )
الله يبيح ما جا منْك .. ويحلّلك ..

الشـاعر / طارق اليحيـى السبيعي ..

المصدر: منتديات شباب حائل - من قسم: الشعر العام